Pinang Sirang Tampuak Part 2. Tagarombol

 Hari Sabtu pun tibo. Bel ka pulang babunyi nyariang. Mala capek mamasuak an bukunyo ka dalam tas ransel merah maron. Di dalam tas alah tasadio baju kaus pengganti pakaian pramuka seragam sekolah hari Sabtu. Kato kawannyo si Eem, kalau awak masuk ka Minang Plaza tu pakai seragam sakola ndak dibuliahan dek Satpam nan tagak di muko mall tu do. Kalau pakai baju bebas dibuliahan. Mako e Mala mambaok baju kemeja putih barendo di kerah nan dibalian dek Uda Oyon untuk rayo tahun patang. 

Saparo balari Mala menuju WC Mesjid sekolahnyo untuk mengganti seragamnyo. Mira manuruik an dari balakang, tugasnyo manjago pintu toilet samantaro Mala mangganti baju. Mira satu-satunyo urang nan tahu tentang janjian pacarannyo jo Uda Sab nyo. Mala bagageh kalua toilet mesjid. “ Kalau batanyo Amak jo Uda Oyon beko baa kok awak alun pulang lai, kicek an awak pai ka Jati, mancaliak ado kawan di OSIS nan sakik yo Ra,” kato Mala. Mira maangguak. “Jan sanjo bana pulang ndak, La,” pasan Mira. “Ndak,” janji Mala. Urang baduo ko samo-samo naik oto angkot oren tapi Mira turun di Simpang Tabiang, nan Mala taruih ka Minang Plaza.

Oto angkot baranti di muko Minang. Mala turun jo mambayia ongkos, sambia malapeh pandang ka janjang teras Minang tu. Dado Mala langsuang taraso badasia maliek Uda Sab manunggunyo. Tangannyo taraso dingin. Ingin rasonya Mala babaliak pulang, antaro cameh jo malu. Mala tatagun mancaliak Uda Sab datang mandakek. “Adiak……,” sapo Uda Sab. Mala senyum sambia menunduk an pandangan, maraso ndak kuat maliek wajah Uda Sab. “ Baa kok anok sajo, Adiak uda?,”. Mala manggeleangan kapalo, masih diam seribu bahaso. Rasonyo seluruh kato nan disiapkannyo tadi samanjak di rumah, cuma bisa tatahan ditenggorokannyo. “Adiak pasti alun makan lai. Hari alah pukua 2. Adiak nio makan dima?” tanyo Da Sab. “Sumbarang uda lah,” cuma itu nan kalua dari muluik Mala. “Kok sumbarang se?” Uda Sab tagalak. “Marilah uda traktir makan bakso. Kato Mira adiak suko makan bakso yo?”. Mala maangguak. Paruik e tibo-tibo ndak lapa, kakinyo taraso guyah dilangkahan. “Co iko bana rasonyo basuo jo Uda Sab ko yo...aneh bana,” rutuk Mala dalam hati. “Cubo tadi baok Mira, pasti ado kawan ka mangicek dan dak jadi sagugup iko,”. Mala bajalan di belakang Uda Sab, mengekori Uda tu ka sebuah cafe di lantai 3 Minang Plaza tu. 

Uda Sab bantuak kahilangan topik dan Mala pun sabana gugup katiko manunggu pesanan mereka datang. “Baa sekolah adiak hari ko? Banyak tugas?” tanyo Uda Sab. Mala senyum, “sekolah awak lancar se nyo da. Tugas iyo banyak, beko di karajoan di rumah,”. Meraso dapek respon dari Mala, Uda Sab mulai banyak batanyo tentang sekolah jo kawan-kawannyo. Ndak lamo pesanan mereka baduo ko datang. “Makan lah diak. Semoga Mala suko. Kalau kurang beko mintak se apo nan adiak suko yo,” kato Uda Sab. Mala maangguak. Dima lo ka tapikia ka batambuah, maabihan isi mangkok nan di hadapannyo sajo taraso payah. Mala mulai manyuok bakso. Hmmm….lamak baksonyo. Tapi baru suapan kaduo, suaro lambek tapi barek mambuek Mala talonjak dan manjatuahan sendoknyo ka mangkok bakso. “Jadi kamari kau pai manjanguak kawan sakik, Mala?” tanyo suaro tu dari balakang Mala. 

Wajah Mala pieh dan pucek langsuang mancaliak ka arah suaro tu. “Pulang!” suaro Uda Oyon, kakaknyo, mamarentah. Uda Sabbanur tacangang. “Tunggu dulu, Da Oyon. Bukan salah Mala, Da. Awak nan maajak Mala kamari,” kato Uda Sabbanur mancubo mambela Mala. “Diam, Ang. Awak salasaian iko sacaro laki-laki beko malam,” suaro Da Oyon mematikan. “Kau pulang, Mala!” perintah Da Oyon. Mala maangguak. Ado raso takuik jo malu bacampua bajadi satu. Mala melirik Uda Sab jo ujuang matonyo. Uda Sab kelihatan prihatin tapi indak berdaya. Mala pulang jo aia mato dek takuik jo malu sambia dielo Da Oyon. 

Jalan pulang taraso panjang dek Mala. Mambonceang di balakang Da Oyon jo Honda Astrea Asranyo, nio rasonyo Mala manjatuahan badan ka jalan. Sepanjang jalan alah tabayang baa penghakiman Amak jo Abak di rumah. Alah tabayang upek caraco urang tuonyo jo Da Oyon maajanyo jo kato-kato nan indak nio didanga Mala. Penderitaan jo ketakutan nan sabananyo ado di rumah. Tabayang sidang penghakiman keluarga ateh apo nan alah dipabueknyo. 

Basambuang..........