Pinang Sirah Tampuak Part 10. Hilang Gali dek Galitik, Abih Miang dek Bageso


“Mala, lai buliah uda batanyo?” Mala maangguak an kapalonyo. “Apo rencana Mala kini ko? Kama Mala rencana ka pai?” tanyo Sab hati-hati. Mala menarik nafas panjang. Matonyo agak barambun. “Mala ndak tahu,Uda. Mala indak punyo dunsanak dakek do. Pai ka rumah bako Mala, beko abak berang lo. Lagian Mala ndak pernah dakek ka bako Mala do dan rumah kaum abak tu ndak dakek do. Ndak mungkin Mala ka sinan do. Kok ka sekolah raso e ndak mungkin.” Sab maangguak tando mangarati. “Baa kalau Mala tingga sajo samo amak jo uda?” tanyo Sab hati-hati. “Lai lah ka mungkin da? Urang kampuang akan mampakicek an uda jo etek. Dan amak jo abak tantu ndak ka basanang hati mancaliak Mala di siko do.” jawek Mala. Sab binguang nio manjawek apo. Nio mangicek an maksud hatinyo, tapi nan kalua dari muluiknyo nan lain-lain sajo. Nan dikatoan Mala memang batua. Tantu ndak mungkin Mala tingga lamo-lamo. Tantu sumbang dicaliak anak gadih sarumah jo anak bujang tanpa nikah. Walaupun ndak ka manga-manga, nan dikicek an urang pasti manga-manga sahinggonyo namo amaknyo basuih dek urang kampuang. Sab menarik nafas panjang, “lai namuh Mala nikah jo uda?” akhirnyo kalua juo pertanyaan nan dari tadi nio ditanyoan ka Mala. Inti e duduk baduo jo Mala di belakang rumah ko itu; mamintak tangan Mala untuk kadijadian urang rumah.


Mala taparangah. Malam Etek Diyar alah manyampaikan itu juo. Tapi nan kalua dari muluik Da Sab sungguh taraso babeda sampai ka hati. Jantuangnyo mulai badatak kareh, muko taraso angek. Mala ndak tahu harus mangicek an apo. Sanang pastilah sanang. Ndak ado alasan untuk baibo hati jiko ado Da Sab duduk di sampiangnyo do. Da Sab manjuluan tangan menyentuh rambuik Mala dan menyelipkannyo ka talingo Mala. Badan Mala raso ka mambaku. Sa umua hiduik, sakali ko baru laki-laki selain abak jo udanyo menyentuh rambuik di kapalonyo. “Uda sayang Mala,” kato Sab saparo babisiak. “Uda tahu alun patuik Uda mangicek an iko ka Mala lai. Dulu uda nio manunggu Mala sampai tamat SMA, tapi maliek keadaan Mala mode iko, ndak nio Uda malapehan Mala surang do. Ndak talok dek uda kahilangan Mala,” kato Sab sambia mamandang muko Mala nan alah mulai memerah. Sab jadi tabik raman. Sab manahan hati supayo ndak manyentuh Mala. Mala masih diam ndak manjawek sepatah kato pun. “Mala, iyo lai sabananyo perasaan Mala samo jo nan Mala tulih di surek tu?” tanyo Sab galigaman dek dak ado jawek dari Mala. Mala menunduk malu takana apo nan ditulisnyo di surek tu. Raso indak patuik tapi nyo alah tatulih dan alah dibaco dek Da Sab. Tibo-tibo Mala merasa nio baranjak dari bangku dan pai ka dalam bilik. Malu antah kama ka disuruk an. “Kan alah uda baco sadonyo nan di surek tu,” kato Mala basikareh dak nio manjawek tanyo Sab. “Iyo, tapi uda nio mandanganyo langsuang dari muluik Mala,” kato Sab basikareh. Nio Mala mangicek an ka Da Sab baa raso hatinyo, baa jantuangnyo batalu-talu walaupun hanyo maingek wajah Sab se sadang galak sambia manyaponyo di jalan satiok pulang sakola, baa hayalannyo sabalun lalok sambia mancaliak foto nan dikirim Sab dalam sureknyo. Hanyo Tuhan nan tahu. Mala cukuik maraso bahagia katiko tahu Da Sab pun menaruh hati ka inyo dan gayuang ko basambuik. Tapi kini Da Sab mamasonyo mangicek an langsuang. Mala malu. Sab manunggu. 


“Iyo….” Mala akhirnyo babisik. Sab maraso tabang mandanga kato “iyo” Mala. Maraso di ateh angin, Sab mandasak. “Iyo apo, Mala? Uda ndak mangarati jo kato iyo Mala tu do,” Sab manahan galak. Pikirannyo mulai usil nio manggaduh Mala. Mala merah muko mamandang Sab. Tibo-tibo matonyo mulai bakaco-kaco. Pelan aia matonyo mulai turun ciek-ciek. Sab kalimpasiangan takuik alah malukoi perasaan Mala. “ Baa kok manangih Mala? Tasingguang Mala dek uda?” tanyo Sab hati-hati. Mala manggeleangan kapalo. “Tu?” Sab penasaran. Mala mamandang muko Sab. “Iyo...isi surek tu batua Mala nan manulih dan itu dari perasaan Mala,”. Aia mato Mala turun ndak baranti. “Tu manga Mala manangih?” tanyo Sab sambia senyum. “Iyo….uda paso-paso juo. Malu Mala,” jawek Mala. “Ondeeeh….maafkan uda,” Sab iyo sabana indak bisa manahan hati. Hatinyo sanang mandanga langsuang dari Mala. Nio dipaluaknyo Mala tapi indak mungkin. Capek diambiaknyo tangan Mala. Diganggamnyo sambia mancaliak ka Mala, “picayolah ka Uda Mala. Jadilah kawan hiduik uda, Mala,”. Mala takajuik, nyo rangguik an tangannyo dari tangan Uda Sab. Sab pun takajuik. “jan dipakaruh aia nan janiah, Uda,” kato Mala manahan diri. “Mala jawek tangan Uda, tapi dengan ciek syarat, Mala nio awak maninggaan kampuang. Mala pai kama uda ka mambaok Mala, tapi indak tingga di kampuang ko do,” kato Mala tegas. Mala capek malangkah ka dapua sabalun Sab babuek labiah jauh. Sab kelimpungan surang meradoan sado raso nan ado di dadonyo. Kapalonyo taraso angek. Nyo langkahkan kakinyo ka sumua tu nyo basuah mukonyo jo aia dingin. Sab tamanuang. Indak mungkinnyo lamo-lamo jo Mala hiduik sarumah tanpa ikatan apopun kalau mode iko reaksi hatinyo waktu baduo sajo basuo jo Mala ko. 


Mak Diyar tatagun mancaliak apo nan tajadi antaro anaknyo jo Mala. Jaleh nampaknyo dari jendela dapua baa Sab mamelok an rambuik Mala di kapalonyo, baa Sab mamaciak an tangan Mala. Dan jaleh lo nampak baa reaksi malu anak gadih Mak Iyur tu mamandang anak bujangnyo. Hati urang baduo ko samo-samo kareh ka iyo. Untuang ka mujua nan si Mala lai babaju jo basalendang malu. Lai capeknyo menguasai keadaan. Ndak sio-sio amak gaek nyo mendidik Mala do. Tapi apo nan nampak sakileh alah cukuik untuk Mak Diyar mambuek kesimpulan nan urang baduo tu ndak mungkin ka tabateh. Sabalunnyo Sab ndak pernah tadanga mangicek an sekalipun tentang padusi salamo ko. Walaupun pernah beberapa kali Mak Diyar manyindia Sab supayo mambaok calon minantu karano umuanyo alah cukuik. Sab cuma galak dan mangicek an tunggu dulu karano alun ado basuo nan cocok lai. Tapi patang jo kini alah jaleh nampak apo nan dikanduang perasaan anak bujangnyo ka anak gadih Mak Iyur. Dan mengenai Mala pun, ndak ado tadanga kaba sumbiang tentang tingkah lakunyo salamo ko. Malah banyak tadanga banyak anak bujang di kampuang nan kanai hati ka Mala ko tapi ndak ado mandapek tanggapan dari nan punyo diri. Mak Iyur pun dulu sempat bapikiran tentang Mala ko untuak anaknyo, tapi berusaha mailangan pikiran maingek sia keluarga Mala. Mak Diyar maraso sagan dan  indak sabandiang. Lagian Mala ko masih ketek umuanyo. Tapi kejadian malam duo hari bantuaknyo ka ma ubah untuang Mala jo anak bujangnyo. Mak Diyar bantuaknyo harus maambiak tindakan capek sabalun talambek, sabalun anaknyo jo anak gadih Mak Iyur tu ilang kendali. Mak Diyar capek malangkah ka biliknyo. “Etek ka pai ka ma?” tanyo Mala mancaliak Mak Diyar manuka  baju. “Etek ka pai mancari amak kau, Mala. Ado nan paralu etek kicek an. Kalau seandainyo ndak mungkin nikah di rumah Mala, di siko sajo. Kalau ndak dapek etek sambutan nan elok Mala, sakurang-kurang e etek alah mangicek ka Amak Mala masalah Mala ko.” kato Mak Diyar. “Mala di kamar sajo yo. Tunggu etek balik yo,” kato Mak Diyar. Mala maangguak an kapalo. 


BERSAMBUNG


Comments

Popular posts from this blog

Pinang Sirah Tampuak Part 6. Anau Manampa Sigai