Pinang Sirah Tampuak Part 9. Budi

Mak Diyar tasintak mandanga igauan si Mala nan lalok di sampiangnyo. “Ampun Mala, bak. Ampuuun,” rintihnyo sambia taisak. Nampak aia mato kalua di suduik matonyo. Mak Diyar pelan manjagoan Mala, “Mala? Mala? Jago nak….”. Mala mambukak matonyo. Capek Mak Diyar mamaluak kapalonyo. “Ssstttt….ndak baa baa do. Mala di rumah etek,” Mala manangih taisak-isak dipelukannyo. Mak Diyar meraba kapalo Mala, taraso agak angek. Mandamam si Mala ruponyo. “Damam Mala mah. Awak minum ubek dari buk Mar patang supayo turun paneh badan Mala yo,” kato Mak Diyar. Mala maangguak. Mak Diyar malapehan pelukannyo, malatak an kapalo Mala di banta dan bajalan ka dakek bopet maambiak ubek. Diambiaknyo sagaleh aia diagiahannyo ka Mala. Mala duduk dan maambiak ubek tu dari tangan Mak Diyar dan maminumnyo. “Lalok lah baliak Mala. Hari masih pukua satangah ampek. Etek ka balakang dulu dih,” kato Mak Diyar. Mala maangguak, baliak marabahan badannyo ka dipan. Etek Diyar kalua kamar, maambiak wudhu’ dan sumbayang tahajjud beberapa rakaat disambuang jo subuh. Itulah kebiasaan Mak Diyar sajak saisuak.

Sab mambukak pintu kamar katiko amaknyo malipek sajadah salasai sumbayang Subuh. “Baa kok ndak amak jagoan Sab? Takalok Sab sumbayang subuh,” kato Sab ka amaknyo. “Ko ka amak jagoan an, tapi Sab alah duluan kalua bilik. Pai lah capek ambik wudhu beko lewat subuh lai. Amak cubo jagoan Mala dulu. Tadi badannyo agak angek,” kato Mak Diyar. Sab maangguak dan lanjuik ka dapua pai manjawek aia. Sab salasai pulo sumbayang katiko Mala tatatiah kalua dari bilik amaknyo. Pandangan mereka basuo sewaktu Mala tagak di pintu. Sab sangaik lah ka ibo mancaliaknyo tapi berusaha tersenyum. Mala menunduk an pandangannyo. “Mala nio maambiak wudhu, da” kato Mala saparo babisik. Sab maangguak an kapalonyo. Mala malangkah ka dapua. Mak Diyar menyusul Mala ka dapua untuk manjarangan aia angek pambuek teh. 

Mala maisak lirih di ateh sajadah badoa supayo Allah selalu memberikan jalan dan kemudahan untuk masalah nan sadang dihadapinyo. Mak Diyar datang mambaok sagaleh teh jo kue basah; pinukuik jo mangkuk untuk pangicok aia. Mala malipek sajadah dan duduk di pinggia dipan. “ Baa raso badan Mala?” tanyo Mak Diyar. “Istirahatlah baliak. Pulihkan badan Mala dulu. Mudah-mudahan amak jo abak Mala beko datang. Uda Sab alah ka rumah Mala patang maagiah tahu baso Mala pingsan di muko rumah etek,” kato Mak Diyar. Mala takajuik. “Ndak ado gunonyo Bang Sab pai ka rumah amak do Tek,” jawek Mala. Gantian Mak Diyar nan takajuik. “Baa kok mode itu kicek Mala?”. Mala menarik nafas panjang, perlahan aia mato nyo mulai jatuh pulo baliak. “Abak alah ma usia awak, tek. Kicek Abak pacah talua ayam ciek ka awak. Jikok kareh juo hati pulang, awak injak kaki rumah, jatuh talak abak wak ka amak,”. Mak Diyar tacangang. Turun aia matonyo mandanga itu sakali. Diambiaknyo kapalo Mala dirangkuhnyo kapalo gadih jolong gadang tu. Maisak-isak lah nyo baduo. “Ndeh Mala, baa kok malang bana nasib? Apo nan buruk nan Mala karajoan mako takah itu bana berang abak jo amak?” tanyo Mak Diyar. “Mala ndak ado manga-manga do Tek. Mala diajak Uda Sab pai makan bakso ka Minang nyo. Ketahuan dek Uda Oyon, disuruhnyo Mala pulang. Tibo di rumah amak berang-berang. Mala ndak ado babuek apo-apo do Tek. Cuma makan sajo nyo,” isak Mala. Mak Diyar tatagun. Baliau mulai maraso ado keterlibatan Sab di balik kasus pengusiran si Mala. “Ndak usah Mala barusuh hati bana. Bia awak cari jalan panyalasaian e basomo. Istirahat Mala dulu yo, minumlah teh e. Etek nio mangicek jo Sab dulu yo,” kato Mak Diyar. Mala maangguak an kapalo.

Mak Diyar tapana mandanga carito lengkapnyo dari muluik Sab. Sungguh baliau indak manyangko kalau penyebab Mala diusia dari rumahnyo adolah anaknyo surang. Tapi baa lah, nasi alah manjadi bubua. Nan kaki alah talangkahkan. Kok disalahan Sab jo Mala, malah masalah akan samakin batambah runyam. “Sab mintak izin ka amak untuk batangguang jawab ateh apo nan tajadi jo Mala. Kalau ndak awak gaduahnyo mak, ndak mungkin kajadiannyo akan sarupo iko. Kalau dipadiakan, kama Mala tu kapainyo Mak samantaro pintu rumahnyo surang alah tatutuik.” Mak Diyar menarik nafas panjang. Indak manyangko baso kajadian akan manjadi sarumik iko bana. Carito muda-mudi tantu biaso tajadi dan bisa dimaafkan selagi indak malangga bateh pergaulan. Tapi nan majadi masalah Pak Codot kalangsangan mandanga kaba hubungan Mala jo Sab sampai tega hati ma usia anak gadihnyo surang, dan bahkan manjatuhan taqlik ka bininyo surang kalau Mala balik ka rumah. Otomatis ndak ado jalan pulang untuk Mala. Tapi nan aneh nyo Mak Iyur pun bantuaknyo indak risau jo hirau jo nasib anak gadihnyo. Mungkin dek posisi Mak Iyur, dimakan abak mati, ndak dimakan amak mati. Kok dibela anak, laki pai. Kok ndak dibela laki, anak nan taniayo. Tapi di malah perasaan keibuan seorang induk maliek anak taniayo?

“Indak sampai hati Isab mancaliak Mala taniayo do Mak. Kok tingganyo di siko tantu sumbang dicaliak urang kampuang. Kok taniayo si Mala, Mak, raso ka manyumpak ruh amak gaeknyo ka awak,” lanjuik Isab ka amaknyo. “ Dek amak indak masalah do Sab. Dari dulu bana taniaik juo dek Amak ndak ka maambiak si Mala ko jadi minantu. Tapi Sab, si Mala ko masih sekolah, masih alun ganok umua e 16 tahun lai. Inyo berhak pulo untuk punyo masa depan. Ciek lai apo nyo nio bana samo Sab?” tanyo Mak Diyar. “ Baa kalau amak nan tanyo Mala. Kalau Sab nan mananyo tantu malu si Mala ko. Kalau amak kan samo padusi, jadi bisalah nyo terbuka ka amak?” usul Sab. “Jadih. Tapi Sab pun berhutang penjelasan ka inyo,” kato Mak Diyar. Sab maangguak.

 

Mak Diyar masuk ka bilik wakatu Mala dilieknyo duduk mamatuik muko di kaco lamari. “Mala, ado nan etek nio kicekan ka Mala. Niaklah duduk awak di dipan ko,” kato Mak Diyar. Mala kemudian duduk di sampiangnyo. “Mode iko  Mala, nan Sab malam tadi alah ka rumah. Alah basuo jo ayah dan jo amak Mala. Nan urang tuo Mala ndak ado takah e ka manjapuik Mala untuk balik pulang ka rumah do. Samantaro Mala di rumah etek mode iko. Nan dek etek indak baa do Mala. Sanang etek Mala bisa tingga jo etek di siko. Samanjak Uni indak ado, etek surang se di rumah kalau Sab baliak ka Jawa. Jalan satu-satunyo Mala etek jodohan ka Da Sab e. Tu etek tanyo ka Mala. Baa Mala jo Isab? Lai ka tuju dek Mala?” tanyo Mak Diyar. Mala cuma manakua. Pipinyo merah katiko Mak Diyar batanyo soal perasaannyo ka Da Sab.”Nan jadi pikiran dek etek, Mala masih sakola…..kalau nikah kini tantu ndak jadi ato sakola Mala do,”jaleh tek Diyar. Mala diam...ndak mangaluakan sapatah kato pun. “Kini ko bapikia lah Mala dulu. Apopun keputusan Mala, kicek an ka etek beko dih,”. Mala maangguak. 

Mala tamanuang surang mangana untuangnyo. Ado raso sadiah jo takuik nan bacampua di dalam hatinyo. Tapi tadi sewaktu mamandang wajah da Sab di pintu waktu subuh tadi Mala maraso tanang mancaliak wajah taduah Da Sab senyum ka inyo. Rasonyo ndak ado nan paralu dikhawatirkan kalau ado Da Sab di dakek inyo. Tibo-tibo dadonyo raso disiram aia dingin, sajuak, setelah menyadari inyo akan aman di siko. Cuma tantu keluarganyo ndak akan basanang hati malieknyo di siko. Tantu akan buruk untu Mak Diyar jo Da Sab. Tapi hari ko, melalui amaknyo, Da Sab alah mamintak tangan Mala untuk dinikahi walaupun dengan bahaso nan lain. Da Sab memang di hatinyo samanjak partamo kali bana basuo. Tapi alun pernah talinteh di pikiran Mala untuk manjadi bininyo. Tibo-tibo Mala manjadi malu muko mambayangan manjadi bini da Sab, tingga sarumah dan hiduik baduo. Tibo-tibo takana kato amak gaek, “kalau Mala ragu, ambik wudhu, sumbayang mintak petunjuk ka nan Satu,”. Ah, amak gaek…….batin Mala marapaan doa untuk baliau.

Keputusan Sab alah bulek untuk bertanggung jawab ka Mala apopun konsekuensinyo. Kalau nyo lapehan Mala kini, nyo takuik Mala akan ka taniayo karano ndak ado tampek mangadu. Memanglah hatinyo mamilih Mala wakatu maliek Mala di surau wakatu bulan puaso dulu. Sab memang jarang pulang samanjaknyo tamat SMA. Katiko ijazah ditarimonyo, Sab langsuang maambik kain, mamintak izin ka amaknyo untuk marantau. Nyo pai ka Jawa dan bakarajo di kadai nasi salamo satu satangah tahun. Setelah itu Sab berusaho untuk malanjuik an sekolahnyo ka janjang nan labiah tinggi, bertekad merubah hiduik amak jo uninyo nan dililik kato bansaik. Siang Sab karajo dikadai grosir Cino, malamnyo Sab kuliah jo baraja. Hanyo amak jo uninyo nan tahu baa nyo berjuang. Tamaik kuliah Sab mulai manggaleh ketek-ketek, sampai akhirnyo kini alah punyo kadai nan bisa dikelolanyo dari jauh dan pulang sesekali mancaliak amaknyo di kampuang. Lai Sab nio mambaok amaknyo ka Jawa tingga di rumah nan alah dibalinyo, cuma amaknyo basikareh ndak nio maninggaan rumah nan alah dibuek an Sab untuk baliau. Sab jo Uninyo ditinggaan abak sadari ketek. Amaklah satu-satunyo urang nan manggadangan mereka baduo dengan mangarajoan apapun. Manggaleh goreang, pai batanam ka sawah urang, maambiak upah harian dan sagalo karajo nan bisa mabuek dapua tetap barasok, Sab jo uninyo tatap sakola. Tapi bara bana ka karehnyo Amak Diyar karajo, penghasilannyo hanyo cukuik untuk makan hari ka hari. Amak gaek Mala lah nan sabananyo diam-diam banyak membantu. Satiok bulan selalu disisiahkan untuk Amaknyo. Kato baliau itu zakat nan didapek dari pensiunan abak gaek Mala. Namonyo pensiuanan perintis, pensiunan untuk urang tuo tuo nan dulu e sato berjuang untuk kemerdekaan. Jadi dari pensiunan tu disisihkan untuk membantu anak yatim sarupo inyo. Jadilah bantuan nan datang tiok bulan tu sebagai cikal bakal biaya sekolah Sab. 

Sab tahu Mala sedari ketek, sedari Mala masih dalam baduangan, nyo dibaok dek Amak gaeknyo kama pai. Sab cuma punyo gambaran tentang Mala sewaktu basuo terakhir kali saatnyo pamit ka Jawa ka Mak Gaek tu. Mala sadang makan tabu, pakai baju merah bungo-bungo dan rambuiknyo dikepang duo dek amak gaeknyo. Katiko basuo Mala alah gadang, Sab raso mancaliak sado kebaikan Amak gaek nan pernah diagiah ka Sab mambayang di wajah Mala. Sajak saat itu, ndak ado nan bisa mamisahan Sab jo bayangan Mala do. Kini di saat Mala diusia dek urang tuonyo, Sab maraso berkewajiban melindungi Mala bantuak amak gaek Mala manyalamaik annyo dulu. Sab tau Mala alun cukuik umua, tapi mancaliak dari fisik nyo, Mala alah manjadi anak gadih nan samparono untuak di suntiang. Mudah-mudahan Mala setuju jo usulnyo tu.

Mak Diyar ma imbau Sab untuk makan salapeh Magrib. Sab masuk ka ruang tangah rumah. Mak Diyar mambantangan lapiak pandan, nasi jo samba alah siap tahidang. Ado Mala duduk basimpuh. Wajahnyo alah mulai ba rono. Sanang hati Sab mancaliaknyo. Isab duduak baselo ba adok adok an jo Mala. Mala manjuluak piriang jo timbala basuh tangan. Badasia darah Sab maambiak piriang dari tangan Mala. Raso di bibia tapi cawan……

BASAMBUANG