Pinang Sirah Tampuak Part 7. Bak Mambalah Batang Buluah

 Hari barabuik sanjo katiko Mak Diyar pulang dari Pasa Gadang baduo jo anak bujangnyo, Sabbanur. Memanglah jadi kebiasaan Mak Diyar pai ka pasa mambali kebutuhan dapua salamo saminggu di hari Sabtu. Biasonyo Mak Diyar ka pasa kalau alah siap Ashar karano kalau sanjo harago sayua, bawang jo lauak bagai jauh lebih murah dari pado siang hari. Hari ko Mak Diyar pulang memang agak talambek dari biaso. Biasonyo sabalun Magrib alah sampai di rumah tapi hari ko Mak Diyar ndak mambali sayua jo lauk sajo di pasa, baliau masuk pasa mambali kain palakat ka dibaok baralek untuk anak laki-laki bako si Sab hari Minggu bisuk. Indak lupo pulo mambali kain jao agak duo halai untuk ka dipakai pai ka surau. Kain jao nan lamo alah puda corak karak anguih e. “Lai takaja juo Magrib dek awak lai ko Sab?”, kato Mak Diyar ka Si Sab nan sadang konsentrasi panuah mambaok Honda GL Pro di jalan bandes kampuang tu. “Lai, insyaallah Mak. Amak paciak sajo pinggang awak agak arek, Mak, bia Isab kajaan supayo wakatu Magrib ndak lapeh,” Isab agak cigin malarian onda e. Limo menit kamudian, onda Isab alah dakek menuju rumahnyo. Tibo-tibo Isab ma rem mandadak katiko sampai dakek loneang jembatan masuk ka rumahnyo. “Astagfirullah al adziim,” ucap si Sab.

“Ado apo Sab?”, Mak Diyar takajuik. Mak Diyar takajuik maliek arah tunjuak si Sab basarato sorot lampu ondanyo. Nampak padusi tagalatak ndak sadarkan diri di jalan ka masuk rumah Mak Diyar. Capek Isab mamasuk an onda e ka halaman rumah. Capek Mak Diyar malatak an karanjang balanjonyo ka janjang rumah, sambia balari di balakang si Sab mancaliak sia nan pingsan tu. Capek Sabbanur maangkek badan nan pingsan tu ka rumah nyo. Amak Diyar capek mambukak kunci pintu rumahnyo jo maambiak senter samantaro Si Sab mambariangan badan nan pingsan jo manyangga kapalonyo jo banta di ateh lapiak pandan nan ado di ruang tangah rumah. Mak Diyar manyorot muko nan pingsan, langsuang baliau jo anaknyo tacangang. Mala! Mukonyo lebam bantuak siap kanai tangan, kakinyo badarah bantuak siap kanai lacuik dek rotan. Mukonyo pucek ndak badarah. Jantuang Sabbanur rasa ka baranti mancaliak Mala sarupo itu. Anak barinduk tu saliang bapandangan. “Amak salai lah dama dulu. Bia Isab pai ka rumah bidan Mar, Isab japuik sajo buk bidan tu baok kamari. Kalau kicek buk bidan tu baok ka rumah sakik, awak baok malam ko juo mak,” kicek Sabbanur. “Indak diagiah kaba ka rumahnyo Sab?”, tanyo Amak Diyar. “Beko lo lah itu dipikian lu Mak. Disalamaik an dulu Mala ko. Pertolongan pertamo lu mak, baru Isab ka rumahnyo maagiah tau Mak Iyur,” kato Isab sambia mangaruik an kaniang. “Jan-jan Mala ko kanai tanganan dek peristiwa siang tadi dek Da Oyon?”, tanyo e dalam hati. Isab capek kalua dari rumah, ma gas onda e pai manjapuik Buk Mar, buk bidan nan tingga dakek puskesmas bantu di kampuangnyo. 

Mak Diyar capek manyalai babarapo dama togok nan gadang. Baliau pai ka dapua, manyauk aia dalam embe, dicampuanyo jo aia angek dalam termos. Jadilah aia angek ngilu ngilu kuku untuk mambarasihan muko jo badan Mala nan baluluk campua jo darah kariang. Manitiak aia matonyo mancaliak anak gadih sarancak itu kanai tanganan. Lambek-lambek dilap muko Mala dek Mak Diyar. Tabayang mandiang anak padusinyo nan alah dulu tigo tahun nan lalu wakatu malahian. Anaknyo maningga dek komplikasi, nan cucunyo indak pulo bisa disalamaik an. Anak Mak Diyar cuma duo, Rasani jo Sabbanur. Samanjak Rasani maningga, Sabbanur satu-satunya nan manjadi harapan Mak Diyar. Si upiak iyo si buyuang iyo, si tuo iyo si bungsu iyo. Mancaliak Mala nan kondisinyo menggenaskan, Mak Diyar taisak. Salasai mambarasihan muko, tangan, jo kaki si Mala, Mak Diyar baliak ka dapua manjawek aia ka sumbayang Magrib. Bialah agak talambek daripado indak samo sakali, pikia Mak Diyar. Dibantangannyo sajadah di sampiang lapiak tidua si Mala, Mak Diyar mulai sumbayang.

Rintihan Mala tadanga wakatu Mak Diyar sadang mangarajoan tasyahud akhir. Capek-capek Mak Diyar malakuan salam, habis tu langsuang malipek sajadahnyo. “Mala? Lai tadanga etek, Mala? Iko Etek Diyar. Mala di rumah etek kini,” kato Mak Diyar sambia maambiak tangan Mala nan dingin. Mala marintih tando sakik sambia mambukak matonyo. “Sakik,” bisiknyo. “Nan ma nan sakik, nak? Etek uruik an. Kapalo Mala sakik?. Saba yo Mala, Uda Sab pai manjapuik Buk Mar dulu. Sabanta lai datang,” kato Mak Diyar agak sagetek panik. “Aia, tek,” kato Mala. Mak Diyar capek maambiak aia ngilu kuku, disuok an nyo pakai sendok ka muluik Mala. Ndak lamo tadanga suaro onda si Sab tibo di muko laman rumah. Sabbanur tibo basarato jo Buk Mar. “Alah sadar Mala, Mak?”, tanyo Sabbanur. “Alah, sabanta ko nyo mintak aia minum,” jawek Mak Diyar. “Alhamdulillah alah sadarnyo. Isab sumbayang lu mak. Mudah-mudahan lai ado juo wakatu Magrib lai,” katonyo sambia malangkah ka dapua maambiak wudhu.

Salasai sumbayang, Sabbanur pai ka ruang tangah tampek Mala dipareso. Bidan Mar alah salasai dan maagiah ubek. “Paruik Mala kosong, ditambah stress. Makonyo pingsan. Mala ndak makan dari pagi do kan?”, tanyo Buk Mar. Mala maangguak. Takana dek Sabbanur tadi siang Mala cuma sempat makan sa sendok baksonyo sabalun Da Oyon datang dan ma elonyo pulang. Tabayang baa perlakuan Uda Oyon ka Mala di Minang Plaza tadi, dado Sabbanur tibo-tibo sakik. Jan-jan si Mala marasai kanai tanganan di rumah dek abak jo udanyo sahinggo e Mala lari dari rumah, pikia Sabbanur dengan perasaan bersalah. Ndak mungkin Mira membocorkan rahasio baso mereka baduo pai makan ka Minang. “Makan yo Mala. Habis tu minum ubek ko, tu istirahat. Jan banyak pikiran dulu, beko tambah sakik Mala,” kato Buk Mar. “Ibuk pulang dulu yo. Kok ado apo-apo, kabari capek yo Sab,” Sabbanur maangguak. “Tarimo kasi banyak, Buk Mar,” kato Sabbanur sambia manyalek an pitih 15 ribu ka tangan Ibuk tu. “Samo-samo,Sab,” Buk Mar baranjak kalua dianta Sabbanur pulang.

“Mala makan dulu dih. Etek tadi ado masak ayam jo kamumu. Habis tu minum ubek lai, tu istirahat. Kalau Mala nio pulang, beko Etek samo Da Sab antaan Mala pulang. Tapi kalau Mala nio malam di siko kini ndak baa juo do,” kato Mak Diyar. Mala maangguak. “Mala ndak usah duduak dulu. Bia Etek suok an sajo,” Mak Diyar senyum. Mala mangunyah makan lambek-lambek sambia maingek apo nan tajadi. Tadinyo di jalan, ka pai ka dangau tampek kuburan amak gaek. Di dangau ado pondok ketek tampek manungguan durian kalau sadang musim. Rencana Mala ka lalok di situ sajo malam ko sabalun pai dari kampuang. “Jan panjang bana manuang, Mala,” kato Mak Diyar. Mala mamandang wajah Mak Diyar. Wajahnyo lunak penuh senyum. Mala langsuang takana mak gaeknyo. Tapi mak gaek ndak ado lai. Amak, abak, jo uda sarato adiaknyo mancaliaknyo bantuak urang asiang dan alah ma usianyo. “Baliak kau ka rumah ko, jatuh talak den ka amak kau,” tabanyang kicek abaknyo. Mala tararau takana itu. Amak Diyar takajuik. Langsuang dipaluaknyo Mala. Mala malapehan tangihnyo sapueh-pueh nan inyo bisa. “Ssstt….jan takuik Mala. Etek ado di siko,” kato Mak Diyar sambia manggusuk kapalo Mala. Ndak bara lamo, tangih Mala alah agak rado. “Abisan makan, Mala. Bia capek cegak. Habis tu minum ubek lai dih. Kalau Mala nio pulang, bia Etek anta beko jo Uda Sab. Tapi kalau Mala nio lalok di siko, Mala lalok di kamar samo etek. Uda Sab lalok di kamar nan ciek lai. Jadi kalau ado apo-apo jo Mala beko malam, etek bisa tahu,” kato Mak Diyar. Mala maangguak. 

Amak Diyar sadang maungkap lauak jo tahu nan dibalinyo dipasa tadi di ateh kompor minyak tanah. Samantaro ditungku kayu ado lokan nan diabuih dalam pariuk supayo indak busuk. Kampuang mereka alun masuk listrik lai, jadi kok ka mambali lauak jo dagiang harus disamba langsuang atau diungkap dulu supayo indak busuk. Sabbanur duduk ditungkahan manunggui amaknyo manyorongan kayu ka tungku. “ Mala lalok di kamar amak, Sab. Bialah dulu nyo istirahat. Bantuaknyo barek masalah di rumahnyo mako si Mala bajalan malam sarupo itu. Ranselnyo panuah jo baju nampak dek amak. Antah kama nyo sanjo rayo mode itu. Ambo heran jo si Iyur tu. Baa lah nyo baranak padusi bantuak mambalah batang batuang. Ciek diangkek nan ciek lai ditijak an. Alah sakampuang urang tahu nan Iyur ko mampasisihan Mala jo si Titut dari keteknyo. Antah apo lah salah paja. Sajak amak gaeknyo maningga, iyo sabana bantuak anak yatim piatu Mala ko dibueknyo di ateh rumah tu. Heran ambo, berang ka anak kok ndak baagak-agak mode itu. Itu apo lo ko lah lai masalah e mangko sampai pingsan paja di tapi jalan. Mujua lai basuo jo awak, kok jo urang nan jaek basuonyo baa lah kejadian e tu. Nan Pak Codot ko manangani anak ndak tangguang-tangguang.” Mak Iyur nampaknyo kesal. “Kini ko, pai lah ka rumah si Mala tu Sab. Turuik urang gaeknyo agiah tahu baso si Mala tu pingsan di dakek loneang muko rumah awak. Beko salah pulo keluarga awak kalau keluarganyo ndak diagiah tahu. Kok lai namuh si Oyon tu manjapuik adiknyo malam ko,” suruh Amak Diyar ka si Sab. Sabbanur ragu. “Bisuk pagi se baa, Mak. Alah malam ma. Bialah dulu si Mala lalok siko”, katonyo. “Pai lah kini. Kalau alah tahunyo anaknyo di siko, kok ka dijapuik atau indak, ndak salah awak lai do Sab,” suruh amaknyo. “Bukan itu Mak, ado nan ka awak caritoan ka amak,” kato si Sab. “eeehh, bekolah dulu bacarito tu. Pai lah cari Pak Codot tu, agiah tahu baso anaknyo di siko,” kato Mak Diyar basikareh. Sabbanur bajalan anggan turun dari rumah. Dalam pikirannyo lai ndak dek gara-gara tadi siang ko? Lambek-lambek Sabbanur malarian ondanyo menuju rumah urang gaek Mala. 

BERSAMBUNG