Pinang Sirah Tampuak Part 5. Apo salahnyo kalau sayang?

 Perkenalannyo jo Uda Sab sabananyo ndak sangajo. Mereka basuo di halaman surau wakatu bulan puaso tigo bulan nan lampau. Wakatu tu Mala pai jo Mira sumbayang tarawih. Da Sab sadang tagak di teras surau katiko pandangan mereka basirobok. Da Sab ramah tersenyum, hati Mala langsuang tasirok. Senyum Uda tu lembut dan menenangkan. Mala nan mambuang muko dulu dek malu. Semenjak itu kalau Mala berpapasan di jalan samo Uda Sab, Mala manunduak malu atau malengah. Sementaro Uda Sab rajin manyapo Mira jo Mala nan pulang sekolah. Hanyo itu komunikasi mereka. Salabiahnyo Mala mandanga--danga carito dari urang kampuang mengenai Uda Sab tu. Ndak ado nan balabihan kecuali pujian kalau kabanyo Uda Sab ko sukses manggaleh di Jawa, alah mambangun rumah  Etek Diyar, amaknyo. Ado beberapa kaba angin nan tadanga di batang aia katiko Mala sadang mambasuh sipatu hari Minggu baso ado beberapo urang anak gadih nan kanai hati ka Uda tu, nan lebih tuo dari si Mala mode Uni Sonya jo Uni Meli. Tapi ndak ado tanggapan dari Uda Sab ko.

Ndak ado komunikasi antaro Mala jo Uda Sab ko selain saliang sapo, maangguak dan senyum. Walaupun kadang Mala memberanikan diri menatap wajah Da Sab, tapi itu cuma sakileh. Sabalun hari ko, cuma sakali Mala nan basuo da Sab ko surang diri, itupun secara dak singajo pulo. Wakatu tu hari Minggu pagi Abak berang-berang karano aia ndak masuk ka baniahnyo. Kapalo banda sawah keluarga mereka ditabek dek urang lain sahinggonyo baniah abak nan baru ka naiak kariang samalaman. Jam sapuluah pagi Mala disuruh Abak ka kapalo banda malapehan tabeknyo. Seharusnyo Uda Oyon nan disuruah abak, tapi dek Uda Oyon alah pai ka parak durian di pungguang bukik, Mala nan disuruh abak jadinyo samantaro abak sibuk maatua iduang anak jawi. Si Titut sadang bakasai kasai baduo jo amak di ateh rumah. Mala ibo hati. Sapanjang jalan ta titiak aia matonyo maraso di anak tirikan, sado karajo kakok dek Mala samantaro si Titut bakasai-kasai bareh di rumah. Siap malapehan tabek banda sawah, Titut duduak tamanuang di tunggua batang surian. Takana Mak gaek jo perlakuan amak jo abak nan indak adil ka inyo. Mala manangih taisak isak sewaktu Uda Sab manyapo, “Dek apo adiak uda manangih di dakek rumpun samak pagi hari?” tanyo Da Sab. Mala takajuik. Mala tagak dan basiap-siap lari karano malu. Uda Sab manjuluan sapu tangan ketek. “Ambiaklah...apuih aia mato adiak. Pulanglah. Ndak elok anak gadih rancak manangih di kapalo banda do” katonyo. Mala maambiak saputangan tu dan malap aia matonyo. Disodorkannyo sapu tangang tu baliak ka Uda Sab. Uda Sab manggeleang, “baok sajo dek Adiak sapu tangan Uda. Kok ado adiak taibo hati, paciak sajo sapu tangan tu. Anggap itu paragiah dari uda,” katonyo. Mala alun sempat mamintak tarimo kasih lai, Uda Sab alah duluan pai. Mala mambaok sapu tangan tu jo hati ringan. Hati nan tadi ibo hilang mode itu sajo mancaliak senyum Uda Sab jo membaui sapu tangan ketek nan harum baun  parfum gatsby. 

Dan hubungan mereka diam-diam diprakarsai dek pos pasan terpercaya, Mira. Sakali duo hari Mira datang mangicek an ka Mala kalau Uda Sab kirim salam. Mala manjawek malu-malu dan mangirim salam baliak. Saliang kirim salam tu berlangsuang salamo duo minggu sabalun surek pertamo da Sab jo fotonyo sampai ka tangan Mala. Paralu waktu saminggu dek Mala mambuek balasan surek untuk Uda Sab. Isinyo pendek sajo barupo pantun nan mangiehan kalau perasaan sayang Uda Sab dibaleh jo raso nan samo dek Mala. Setelah balasan surek pertamo tu sampai ka tangan Da Sab, resmi mereka baduo pacaran. Surek tu manjadi buhua ikatan hati mereka baduo. Tapi kalau basuo, Uda Sab jo Mala cuma saliang senyum dan pandang. Sampai Da Sab maajak makan ka Minang Plaza tadi siang. Sampai di situ perkembangan hubungan mereka baru tapi bencana alah mulai datang.

Mala mamatuik wajah kusuiknyo di kaco lamari. Matonyo merah jo sambok. Dalam hati, apo nan salah nan dikarajoannyo mangko amak mangicek co itu bana tadi. Anak gata! Badarah hati Mala maingek itu. Apo nan salah dengan menyanyangi urang lain diam-diam? Perasaannyo ka Uda Sab datang baitu sajo tanpa bisa dicegah. Dan ndak ado nan salah nan dikarajoannyo do kecuali memenuhi undangan uda tu makan siang. Indak pulo di tampek nan langang Uda Sab mambuek janji. Tampeknyo pun di Minang Plaza, urang rami di sakuliliang mereka baduo. Uda Sab ndak ado bakato serong, cuma mananyoan baa sekolah jo kawan-kawannyo sajo. Maresek ujuang kuku Mala pun Uda tu indak. Dikatoan gata perbuatannyo nan mode itu ndak bisa tatarimo dek batin Mala. 

Kok dicaliak lo kawan-kawan nan samo gadang, perangai mereka lebih parah lo lai. Si Mira se dua kali satahun pacarnyo baganti. Mereka ko janjian bagai di hulu batang aia, balanjuang dan mandi-mandi basamo di lubuk. Malah pernah Mira bacarito kalau Idon anak one Rasani alah pernah manciumnyo. Sambia galak kawan-kawannyo bantuak Puspa, Puput, dan yang lainnyo bacarito baa mereka pai malam minggu manonton layar tancap jo pacarnyo. Kalau bulan puaso mereka ko pai mancaliak MTQ ka kampuang sabalah atau pai jalan-jalan asmara subuh sambia pakai kain talakuang siap sumbayang subuh di surau. Bahkan ado malah laki-laki nan mamakai kain talakuang atau ba unduang-unduang kain sapayo urang ndak curiga kalau mereka pacaran. Kicek urang nan lalu bantuak kawan samo padusi nan mamaciak pinggang atau bajalan sambia bapaluak. Padohal itu akal-akalan pacarnyo supayo bebas manga-manga di baliak kain saruang atau kain talakuang tu. Bahkan bulan puaso pun kawan-kawannyo ndak takuik doso babuek mode itu. 

Mala ndak ado babuek mode itu. Jan kan marasoan baa dipaluak laki-laki atau dicium laki-laki, mabanyanganyo sajo Mala ndak bisa. Pernah Mala dulu batanyo ka amak gaek caro mancium nan dikicek an dek kawan-kawannyo tu. Apo ndak baradu hiduang samo hiduang kalau awak dicium laki-laki? Amak gaek tagalak sambia maacak rambuik panjangnyo. Sambia galak amak gaek manjalehan, “itu karajo urang gadang mah La. Anak ketek indak buliah mangarajoan itu. Kalau laki-laki jo padusi nan alun menikah mangarajoan itu, namonyo zina. Haram dek ugamo. Badoso gadang. Kaka dalam narako.” Dan Mala alah baraja itu wakatu di surau jo pelajaran agamo di sekolah. Namo pelajarannyo bermacam-macam dosa besar. Mala tahu inyo ndak buliah mangarajoan itu.

Jadi salahnyo dima? Apo nan salah jo raso suko nan datang, jo jatuh cinta? Mala pun ndak menghendaki itu. Perasaan tu datang begitu sajo tanpa diundang. Salah siapo tu? Dan pantaskah amak malabeli inyo dengan julukan terkutuk tu tanpa inyo tahu salah e dima?

Mala mahapuih aia matonyo. Hari alah manunjuak an pukua sangah limo. Saatnyo manyamba jo mambasuah piriang. Kalau sampai absen, Amak pasti berang lo baliak ka inyo. Sambia mambukak pintu biliak, Mala badoa dalam hati supayo Amak jo Uda Oyon ndak mangicek an apo-apo ka Abak masalah di Minang Plaza tu.